राजगड किल्ल्यावर फिरण्यासाठी गेलेल्या एका तरुणाचा डोक्यात दगड पडल्याने दुर्दैवी मृत्यू झाला. ही घटना रविवारी सायंकाळी घडली. अनिल विठ्ठल आवटे असं या तरुणाचं नाव असून तो पोलिस भरतीसाठी मेहनत करत होता. मात्र, या दुर्दैवी घटनेमुळे त्याचं पोलिस खात्यात काम करण्याचं स्वप्न अधुरं राहिलं.
रविवारी सायंकाळी, धायरी येथील पोलिस भरती अकॅडमीतील काही प्रशिक्षणार्थी राजगड किल्ल्यावर ट्रेकिंगसाठी गेले होते. यावेळी पाली दरवाज्याजवळील बुरुजावरून एक दगड अनिलच्या डोक्यावर पडला. यात त्याला गंभीर दुखापत झाली. त्याच्या मित्रांनी तातडीने त्याला गडावरून खाली आणून वेल्हे ग्रामीण रुग्णालयात दाखल केलं. मात्र, डॉक्टरांनी उपचारापूर्वीच अनिलचा मृत्यू झाल्याचं घोषित केलं.
डॉक्टर ज्ञानेश्वर हिरास यांनी दिलेल्या माहितीनुसार, अनिलच्या डोक्याला गंभीर इजा झाली होती, तसेच कानातूनही मोठ्या प्रमाणात रक्तस्त्राव झाला होता, ज्यामुळे त्याचा मृत्यू झाला. मूळचा परभणीचा रहिवासी असलेला अनिल धायरी येथे आपल्या चुलत्यांकडे राहून पोलिस भरतीची तयारी करत होता. मात्र, दुर्दैवाने राजगडाच्या सहलीत त्याचा मृत्यू झाल्याने त्याचं स्वप्न अपुरं राहिलं. या घटनेचा पुढील तपास वेल्हे पोलीस करत आहेत.
Leave a Reply