विवाहाच्या सात जन्मांच्या शपथा घेतलेल्या पत्नीनेच आपल्या पतीची निर्दयी हत्या करावी, ही कल्पना कोणालाही असह्य वाटेल. मात्र, मेरठमध्ये घडलेल्या एका धक्कादायक घटनेत, पत्नीने प्रियकराच्या मदतीने पतीचा खून करून त्याचे १५ तुकडे केल्याचे उघड झाले आहे.
या हत्याकांडानंतर देशभर संतापाची लाट उसळली असून, मृत सौरभ सिंह राजपूतच्या कुटुंबीयांसह आरोपी पत्नी मुस्कान रस्तोगीच्या आई-वडिलांनीही तिला फाशीची शिक्षा देण्याची मागणी केली आहे.
सौरभने मुस्कानवर मनापासून प्रेम केले, तिच्यासाठी कुटुंबालाही दूर केले, मात्र तिच्या बेईमानीमुळे त्याला जीव गमवावा लागला. “आमचा जावई खूप चांगला होता, पण आमची लेक वाया गेली. सौरभसाठी आम्ही न्याय मिळवूच. मुस्कानला फाशीची शिक्षा मिळायलाच हवी,” अशी मागणी तिच्या आई-वडिलांनी केली आहे.
सौरभ अमेरिकेतील एका कंपनीत मर्चंट नेव्हीमध्ये नोकरी करत होता. तो मुलीच्या सहाव्या वाढदिवसानिमित्त मेरठला परतला असताना, मुस्कानने प्रियकर साहिलच्या मदतीने त्याला संपवण्याचा कट रचला.
४ मार्च रोजी सौरभची हत्या करून त्याचे १५ तुकडे करण्यात आले आणि प्लास्टिकच्या ड्रममध्ये भरून त्यावर सिमेंट टाकून सील करण्यात आले. या थरारक घटनेने संपूर्ण देश हादरला आहे.
सौरभच्या हत्येनंतर मुस्कानने त्याच्या फोनवरून कौसानीमधील काही फोटो आणि व्हिडिओ सोशल मीडियावर पोस्ट केले, जेणेकरून तो जिवंत असल्याचा आभास निर्माण करता येईल. मात्र, सौरभच्या कुटुंबीयांना संशय आल्याने त्यांनी तात्काळ पोलिसांत तक्रार दाखल केली.
तपासादरम्यान पोलिसांनी मुस्कान आणि साहिलला अटक केली. कडक चौकशीत दोघांनी गुन्ह्याची कबुली देत मृतदेह ड्रममध्ये लपवल्याचे सांगितले.
सौरभ आणि मुस्कानने २०१६ मध्ये प्रेमविवाह केला होता. सौरभने त्यासाठी मर्चंट नेव्हीतील नोकरीही सोडली, परंतु कुटुंबीयांच्या विरोधामुळे दोघे वेगळे राहू लागले.
२०१९ मध्ये त्यांच्या संसाराला गोडवा आला आणि त्यांना एक मुलगी झाली. मात्र, त्याच दरम्यान मुस्कानचा सौरभच्या मित्र साहिलसोबत प्रेमसंबंध जुळला.
सौरभला जेव्हा याची माहिती मिळाली, तेव्हा दोघांमध्ये वाद झाले आणि घटस्फोटापर्यंत प्रकरण पोहोचले. मात्र, मुलीच्या भविष्यासाठी त्यांनी पुन्हा एकत्र राहण्याचा निर्णय घेतला.
२०२३ मध्ये सौरभ पुन्हा अमेरिकेत नोकरीसाठी गेला. यानंतर मुस्कान आणि साहिलच्या नात्यात आणखी जवळीक निर्माण झाली आणि त्यांनी सौरभला संपवण्याचा कट रचला.
शेवटी, ४ मार्च रोजी या भयंकर कटाची अंमलबजावणी करण्यात आली, आणि मृतदेह निर्दयपणे नष्ट करण्याचा प्रयत्न झाला.
या अमानुष हत्याकांडामुळे मेरठसह संपूर्ण देशात संतापाची लाट उसळली आहे. सौरभच्या कुटुंबीयांसह मुस्कानच्या पालकांनीही तिला फाशीची शिक्षा देण्याची मागणी केली आहे.
सध्या पोलिस तपास सुरू असून, आरोपींवर कठोरात कठोर कारवाई केली जाईल, अशी ग्वाही प्रशासनाने दिली आहे.
Leave a Reply