जम्मू-काश्मीरमधील पहलगाम येथे घडलेल्या दहशतवादी हल्ल्यात २६ निष्पाप नागरिकांचा बळी गेल्यानंतर, या हल्ल्याला समर्थन देणाऱ्या सोशल मीडिया पोस्टमुळे पोलिसांनी कारवाई करत एकाला अटक केली आहे. झारखंडमधील बोकारो जिल्ह्यातील मिल्लत नगर येथील रहिवासी मोहम्मद नौशाद (वय ३१) याला बालिडीह पोलिसांनी बुधवारी ताब्यात घेतले.
नौशाद हा बोकारो स्टील प्लांटच्या सेवानिवृत्त कर्मचाऱ्याचा मुलगा आहे. या प्रकरणाची माहिती भाजपचे रांचीचे आमदार सी. पी. सिंग आणि माजी आमदार विरांची नारायण यांनी बोकारो जिल्ह्याचे पोलीस अधीक्षक मनोज स्वरगियारी यांना दिली. त्यानंतर संबंधित व्यक्तीविरोधात कठोर कारवाई करण्याची मागणी त्यांनी केली.
पोलिसांनी दिलेल्या माहितीनुसार, आरोपीविरुद्ध भारतीय न्याय संहितेतील (BNS) विविध कलमांखाली गुन्हा दाखल करण्यात आला आहे. स्थानिक भाजप नेत्यांनी त्याच्यावर देशद्रोहाचा गुन्हा दाखल करण्याची मागणीही केली आहे. या पार्श्वभूमीवर बोलताना पोलीस अधीक्षक मनोज स्वरगियारी म्हणाले, “कायद्याशी खेळ करणाऱ्यांना माफ केले जाणार नाही. देशविरोधी कृतींवर पोलीस यंत्रणा अत्यंत सावध आहे.”
दरम्यान, मध्यप्रदेशातील दमोह येथेही अशीच घटना घडली. पहलगाम हल्ल्यानंतर सोशल मीडियावर आक्षेपार्ह पोस्ट आणि प्रतिक्रिया दिल्याच्या प्रकरणी दोन जणांविरुद्ध गुन्हा दाखल करण्यात आला आहे. दमोह शहराचे पोलीस अधीक्षक अभिषेक तिवारी यांनी याबाबत माहिती दिली.
“पहलगाम घटनेनंतर आम्ही सोशल मीडियावर सतत नजर ठेवत होतो. त्यामध्ये दोन अशा पोस्ट समोर आल्या ज्या समाजात तेढ निर्माण करू शकतात आणि शांतता भंग होण्याचा धोका निर्माण करतात,” असे तिवारी म्हणाले. या प्रकरणात आरोपी वसीम खान आणि तन्वीर कुरेशी यांची ओळख पटली असून, त्यांच्याविरुद्ध कोतवाली पोलीस ठाण्यात भारतीय न्याय संहिताच्या कलम १९६ अंतर्गत गुन्हा दाखल करण्यात आला आहे.
“पहलगामसारख्या संवेदनशील घटनेनंतर सोशल मीडियावर कोणतीही भडकाऊ पोस्ट जनतेच्या शांततेस धोका ठरू नये, यासाठी आम्ही चौकसपणे निरीक्षण करत आहोत. अशा पोस्ट्समुळे धार्मिक भावना दुखावल्या जाऊ शकतात आणि सामाजिक सलोखा धोक्यात येऊ शकतो. त्यामुळे अशा पोस्ट्स व कमेंट्सवर लक्ष ठेवणे सुरूच राहील,” असे पोलीस अधीक्षक तिवारी यांनी सांगितले.
पोलीस आरोपींची चौकशी करत असून, त्यांच्या पोस्ट्सवरील इतर प्रतिक्रियांचीही तपासणी केली जाणार आहे. “या प्रकरणाच्या मुळाशी जाण्याचा आमचा प्रयत्न असेल,” असेही त्यांनी स्पष्ट केले.
Leave a Reply