नवी दिल्ली: केंद्रीय रस्ते परिवहन आणि राष्ट्रीय महामार्ग मंत्री नितीन गडकरी यांनी महामार्गांवरील अपघातांची संख्या आणि त्यामुळे होणारे मृत्यू कमी करण्यासाठी मोठे पाऊल उचलले आहे. २०१४ पासून ते या दिशेने प्रयत्नशील असून, आता त्यांनी ‘अडव्हान्स ट्रॅफिक मॅनेजमेंट सिस्टम’ (ATMS) द्वारे महामार्गांचे अत्याधुनिक डिजिटलीकरण करण्याचा निर्णय घेतला आहे. यामुळे नियम मोडणाऱ्या वाहनचालकांना आळा घालणे शक्य होणार आहे. सध्या द्वारका एक्स्प्रेस-वे आणि दिल्ली-गुरुग्राम एक्स्प्रेस-वेसह सुमारे ५००० किलोमीटर महामार्गांवर हे ‘इंटेलिजेंट सिस्टम’ बसवण्यात आले आहे. इंडियन हायवे मॅनेजमेंट कंपनी लिमिटेड-आयटीएसचे मुख्य उत्पादक अधिकारी अमृत सिंहा यांनी दिलेल्या माहितीनुसार, द्वारका एक्स्प्रेस-वेवरील ५६ किलोमीटरचा भाग ११० कृत्रिम बुद्धिमत्तायुक्त (AI) कॅमेऱ्यांच्या माध्यमातून ‘कव्हर’ केला जात आहे.
रस्त्यांचे डिजिटलीकरण आणि त्याचे फायदे
या यंत्रणेमुळे बंगळूरू-म्हैसूर महामार्गावर अपघातांमध्ये लक्षणीय घट झाली आहे. या सिस्टिममध्ये बसवलेले कॅमेरे ५०० मीटर पुढील आणि ५०० मीटर मागील हालचाली टिपू शकतात. यामुळे रस्त्यांवरील घडामोडींवर बारकाईने लक्ष ठेवणे शक्य होते. महाराष्ट्रासह देशभरातील चार पदरी व त्यापेक्षा मोठ्या महामार्गांवर पुढील दोन-तीन वर्षांत ही यंत्रणा बसविण्यात येणार आहे. सध्या दिल्ली-मुंबई एक्स्प्रेस-वेच्या कोटा विभागात ही यंत्रणा कार्यरत आहे. हे डिजिटलीकरण अपघात रोखण्यासाठी एक प्रभावी उपाय ठरणार आहे. वाढती वाहनसंख्या आणि सुरक्षिततेची गरज स्वातंत्र्यापासून ते आतापर्यंत देशात ३८.६ कोटी वाहने नोंदणीकृत झाली आहेत. ‘राजमार्ग यात्रा’ ॲपवर राष्ट्रीय आणि राज्य महामार्ग, टोलफ्री रस्ते यासंबंधीची माहिती उपलब्ध आहे, ज्यामुळे प्रवाशांना मदत मिळते. वाढत्या वाहनसंख्येमुळे रस्त्यांवरील सुरक्षितता अधिक महत्त्वाची बनली आहे आणि गडकरींचे हे ‘इंटेलिजेंट सिस्टम’ या दिशेने एक महत्त्वाचे पाऊल आहे.
Leave a Reply