मुंबई : राज्यातील वैद्यकीय प्रवेश प्रक्रियेत मोठ्या गैरप्रकाराचा पर्दाफाश झाला आहे. CET सेलने १५२ विद्यार्थ्यांना मूळ कागदपत्रांची पडताळणी करण्यासाठी नोटिसा बजावल्या होत्या. मात्र मुदत संपल्यानंतर फक्त एका विद्यार्थ्यानेच आपली मूळ कागदपत्रं सादर केली आहेत. या घटनेमुळे प्रवेश प्रक्रियेतील “सीट ब्लॉकिंग” घोटाळ्यावर पुन्हा एकदा प्रकाश पडला आहे.
राज्य सरकारच्या CET सेलने यंदा तिसऱ्या फेरीसाठी अर्ज करणाऱ्या विद्यार्थ्यांची ऑनलाईन पडताळणी सुरू केली होती. ही कारवाई तेव्हा सुरू झाली, जेव्हा बाहेरील राज्यातील विद्यार्थ्यांनी महाराष्ट्रातील वैद्यकीय महाविद्यालयांच्या यादीत नावे नोंदवली असून त्याच विद्यार्थ्यांनी इतर राज्यांतही जागा निश्चित केल्याचे समोर आले. या विद्यार्थ्यांमुळे राज्यातील पात्र विद्यार्थ्यांच्या जागांवर गदा आली आहे.
CET सेलच्या तपासात १५२ अर्ज संशयास्पद आढळले. mismatched गुणपत्रिका, बदललेले PDF फाईल्स, आणि इतर राज्यातील डोमिसाईल प्रमाणपत्रं ही काही प्रमुख विसंगती होती. या सर्व अर्जदारांना १६ ऑक्टोबर २०२५ पर्यंत मूळ कागदपत्रं सादर करण्यास सांगण्यात आलं होतं. मात्र अंतिम मुदतीपर्यंत फक्त एका विद्यार्थ्यानेच कागदपत्रं सादर केली, असे CET सेलच्या अधिकाऱ्यांनी सांगितले.
शैक्षणिक क्षेत्रातील तज्ज्ञांच्या मते, हा प्रकार “सीट ब्लॉकिंग” घोटाळ्याशी संबंधित आहे. काही एजंट उच्च गुण मिळवणाऱ्या विद्यार्थ्यांचा वापर करून एकाच वेळी वेगवेगळ्या राज्यांत जागा निश्चित करतात. नंतर हे विद्यार्थी प्रवेशासाठी उपस्थित राहत नाहीत आणि त्या जागा रिकाम्या राहतात. या रिकाम्या जागांवर खासगी महाविद्यालयांना प्रीमियम दराने प्रवेश देण्याची संधी मिळते.
राज्यातील अनेक विद्यार्थी या घोटाळ्यामुळे वैद्यकीय शिक्षणापासून वंचित राहतात. CET सेलने या पार्श्वभूमीवर सर्व बाहेरील राज्यातील अर्जांची कठोर तपासणी सुरू केली आहे. वैध कागदपत्रं सादर करण्यात अपयशी ठरणाऱ्या विद्यार्थ्यांची नावे प्रवेश यादीतून वगळली जाणार आहेत.
सध्या शासकीय महाविद्यालयांतील १३९ आणि खासगी महाविद्यालयांतील जवळपास ६०० जागा रिकाम्या आहेत. या पार्श्वभूमीवर CET सेलची कारवाई ही प्रवेश प्रक्रियेतील पारदर्शकतेसाठी एक महत्त्वाचं पाऊल मानली जात आहे.
Leave a Reply