मुंबई : पर्यावरण क्षेत्रातील जगातील सर्वात प्रतिष्ठित पुरस्कारांपैकी एक मानल्या जाणाऱ्या अर्थशॉट प्राईजचे आयोजन पुढील वर्षी मुंबईत होणार असल्याची महत्त्वपूर्ण घोषणा आज करण्यात आली. अर्थशॉट प्राईजचे मुख्य कार्यकारी अधिकारी जेसन नॉफ यांनी महाराष्ट्रातील वरिष्ठ नेतृत्वाची भेट घेतली आणि आगामी कार्यक्रमाच्या तयारीबाबत चर्चा केली.
जेसन नॉफ यांच्यासोबत त्यांच्या टीमचाही समावेश असून, त्यांचे राज्य शासनाकडून मनापासून स्वागत करण्यात आले. या भेटीला विशेष महत्त्व प्राप्त झाले कारण या कार्यक्रमाच्या निमित्ताने महाराष्ट्राला जागतिक हवामान उपक्रमांचे केंद्रस्थान बनण्याची संधी मिळणार आहे. अर्थशॉट प्राईजचे आयोजन मुंबई क्लायमेट वीकच्या व्यासपीठावर होणार असून, हा उपक्रम प्रोजेक्ट मुंबईच्या नेतृत्वाखाली आणि महाराष्ट्र शासनाच्या भागीदारीत पार पडणार आहे. प्रोजेक्ट मुंबईचे संस्थापक व मुख्य कार्यकारी अधिकारी शिशिर जोशी यांनीही या भेटीदरम्यान तयारी आणि सहकार्याविषयी माहिती दिली.
महाराष्ट्र सरकारने हवामान बदल, पर्यावरण संरक्षण आणि शाश्वत विकासाच्या दिशेने गेल्या काही वर्षांत महत्त्वपूर्ण पावले उचलली आहेत. नवीकरणीय ऊर्जा, हरित धोरणे, शून्य-कार्बन उद्दिष्टे आणि हवामान अनुकूल विकास या क्षेत्रांत राज्याने अनेक उपक्रम राबवले आहेत. अर्थशॉट प्राईजचे आयोजन हे त्या प्रयत्नांना जागतिक पातळीवर मान्यता मिळाल्याचे द्योतक असल्याचे अधिकाऱ्यांनी सांगितले.
मुंबईसारख्या किनारी महानगरावर हवामान बदलाचा वाढता प्रभाव पाहता, अशा आंतरराष्ट्रीय उपक्रमांमुळे स्थानिक ते जागतिक पातळीवरील तज्ज्ञ, धोरणकर्ते आणि नवकल्पकांना एकत्र येण्याची संधी उपलब्ध होणार आहे. या कार्यक्रमातून शाश्वततेवरील चर्चांना चालना मिळण्याबरोबरच पर्यावरणपूरक उपाययोजना राबवण्यास गती मिळेल, अशी अपेक्षा व्यक्त केली जात आहे. अर्थशॉट प्राईजचे मुंबईत होणारे आयोजन महाराष्ट्राच्या हवामान कृती कार्यक्रमाला आंतरराष्ट्रीय मान्यता देणारा आणि परिवर्तनाच्या दिशेने राज्याला नवी ऊर्जा देणारा ठरणार आहे.
Leave a Reply