महाराष्ट्र शासनाने २०२६ वर्षासाठी राज्यातील सर्व शासकीय कार्यालयांसाठी एकूण २४ सार्वजनिक सुट्ट्यांची घोषणा केली आहे. विशेष म्हणजे ११ नोव्हेंबर २०२६ (बुधवार) रोजी येणाऱ्या भाऊबीजेसाठी अतिरिक्त सार्वजनिक सुट्टी देण्याचा निर्णय घेतला असून, सामान्य प्रशासन विभागाने यासंदर्भातील अधिसूचना जारी केली आहे.
जाहीर करण्यात आलेल्या सुट्ट्यांमध्ये प्रामुख्याने प्रजासत्ताक दिन, स्वातंत्र्य दिन, महात्मा गांधी जयंती तसेच उगादी, गुडीपाडवा, रमजान ईद, गणेश चतुर्थी, नवरात्र, दसरा, दीपावली आणि इतर प्रमुख सणांचा समावेश आहे. या सुट्ट्या राज्यातील सर्व शासकीय कार्यालये, राज्य शासनाचे उपक्रम, महानगरपालिका, नगरपरिषद, नगरपंचायत, जिल्हा परिषद, पंचायत समित्या आणि ग्रामपंचायती यांना लागू राहणार आहेत.
शासनाने स्पष्ट केले आहे की, सार्वजनिक सुट्ट्यांचे नियोजन करताना राज्यातील विविध धर्म आणि समुदायांचे प्रमुख सण, राष्ट्रीय दिवस आणि परंपरागत कार्यक्रमांचा विशेष विचार करण्यात आला आहे. त्यामुळे २०२६ मध्ये कर्मचार्यांना अधिक सुटसुटीत कॅलेंडर मिळणार असून, अनेक महत्त्वाच्या सणांना सलग किंवा मध्यात सुट्टी मिळण्याची सुविधा उपलब्ध होईल.
याशिवाय १ एप्रिल २०२६ (बुधवार) हा दिवस राज्यातील सर्व बँकांसाठी वार्षिक लेखापरीक्षणासाठी सुट्टी म्हणून जाहीर करण्यात आला आहे. ही सुट्टी फक्त बँकांसाठी लागू राहणार असून, इतर शासकीय कार्यालये आणि उपक्रम नियमितपणे सुरू राहतील.
सर्व शासकीय कार्यालयांनी आणि स्थानिक स्वराज्य संस्थांनी या अधिसूचनेनुसार २०२६ साठीच्या सुट्ट्यांचे वार्षिक नियोजन करण्याचे निर्देश देण्यात आले आहेत. नागरिकांसाठीही हे कॅलेंडर सण-समारंभ आणि प्रवासाचे नियोजन करण्यासाठी मार्गदर्शक ठरणार आहे.
Leave a Reply