मुंबई : सायन (पूर्व) येथील फ्लँक रोडवरील बंद पडलेली सायकल मार्गिका त्वरित स्वच्छ करून वापरासाठी खुली करावी, असे आदेश मुंबई उच्च न्यायालयाने महानगरपालिकेला दिले आहेत. या मार्गिकेवर कचरा, राडारोडा आणि अनधिकृत वाहनांचा कब्जा झाल्याने वाहतूक कोंडी, ध्वनीप्रदूषण आणि आपत्कालीन सेवांना अडथळा निर्माण होत असल्याचा मुद्दा याचिकेद्वारे न्यायालयासमोर मांडण्यात आला होता.
न्यायमूर्तींच्या खंडपीठाने या प्रकरणी सुनावणीदरम्यान महानगरपालिकेच्या बेफिकिरीवर तीव्र नाराजी व्यक्त केली. सायकल मार्गिकेसारख्या सार्वजनिक सुविधेची योग्य देखभाल न होणे हे प्रशासनाच्या निष्काळजी वृत्तीचे निदर्शक असल्याचे निरीक्षण न्यायालयाने केले. या मार्गिकेवरील कचरा आणि अतिक्रमण दूर करण्यासोबतच नियमित स्वच्छता आणि देखभाल यंत्रणा उभारण्याचेही निर्देश महापालिकेला देण्यात आले आहेत.
याचिकाकर्त्याने सायकल मार्गिकेवर साचलेला कचरा, पार्क केलेली वाहने आणि रुग्णवाहिकांच्या अडथळ्यांचा उल्लेख करून ‘पे-अँड-पार्क’ योजना राबवण्याची मागणी केली होती. मात्र, महापालिकेने तो प्रस्ताव नाकारला होता. सुनावणीदरम्यान न्यायालयाने याचिकेतील काही दाव्यांवर शंका घेतली असली, तरी परिसरातील अस्वच्छता आणि अतिक्रमणाबाबत तातडीने कार्यवाही करावी, असा ठोस आदेश दिला आहे.
या निर्णयामुळे महापालिकेला केवळ स्वच्छतेची नव्हे, तर सार्वजनिक जागेच्या वापर व देखभालीची जबाबदारी स्वीकारावी लागणार आहे. सायकल मार्गिकेच्या दुर्लक्षामुळे नागरिकांना त्रास होत असल्याचे न्यायालयाने नमूद केले असून, “एकदा सुविधा उभारली की जबाबदारी संपली” असा प्रशासनाचा दृष्टिकोन अस्वीकार्य असल्याचे स्पष्ट केले आहे.
न्यायालयाच्या या आदेशानंतर महानगरपालिकेच्या संबंधित विभागाकडून लवकरच स्वच्छता आणि पुनर्वापराचा आराखडा सादर केला जाईल, अशी अपेक्षा व्यक्त केली जात आहे.
Leave a Reply