स्थानिक स्वराज्य संस्थांच्या निवडणुका मतदानाच्या काही तास आधीच राज्य निवडणूक आयोगाने पुढे ढकलल्याने राज्यातील राजकीय वातावरण ढवळून निघाले आहे. या निर्णयावर मुख्यमंत्री देवेंद्र फडणवीस यांनी तीव्र नाराजी व्यक्त केली आहे. छत्रपती संभाजीनगरमध्ये पत्रकारांशी संवाद साधताना त्यांनी आयोगाच्या निर्णयाला “कायद्याचा चुकीचा अर्थ लावणारा आणि प्रामाणिक उमेदवारांवर अन्याय करणारा” असा ठपका ठेवला.
फडणवीस म्हणाले, “कोणीतरी कोर्टात याचिका दाखल केली म्हणून निवडणूक थांबवायची, हा कोणता नियम? आजवर राज्यात किंवा देशात असा प्रकार कधीच घडला नाही. आयोग कोणता कायदा वाचत आहे, कोणाचा सल्ला घेत आहे, याचीही कल्पना नाही.” त्यांनी यावर अधिक भाष्य करताना सांगितले की, स्वतः कायदा तपासून आणि तज्ज्ञ वकिलांशी चर्चा करून त्यांनी हे सुनिश्चित केले आहे की केवळ याचिका दाखल झाल्याने निवडणूक पुढे ढकलण्याचे कोणतेही वैधानिक कारण नाही.
मुख्यमंत्री फडणवीस यांनी हा निर्णय “उमेदवारांच्या अनेक दिवसांच्या परिश्रमांवर पाणी फेरणारा” असल्याचे सांगितले. “उद्या मतदान असताना आजच निवडणूक लांबणीवर टाकली तर उमेदवारांना पुन्हा 15-20 दिवस नव्याने प्रचार करावा लागेल. हे पूर्णपणे अव्यवहार्य आहे,” असे त्यांनी स्पष्ट केले.
सरकार या प्रकरणात राज्य निवडणूक आयोगासमोर आपले सादरीकरण करणार असून हा निर्णय कायदेशीरदृष्ट्या असंगत असल्याचे सरकार स्पष्ट करणार आहे. निवडणूक आयोगाचे स्वायत्त अस्तित्व मान्य असले तरी अशा प्रकारचे निर्णय लोकशाही प्रक्रियेवर आणि निवडणुकांच्या विश्वसनीयतेवर प्रश्नचिन्ह निर्माण करतात, असे मत फडणवीसांनी व्यक्त केले.
या निर्णयामुळे उमेदवार, राजकीय पक्ष आणि प्रशासनात संभ्रमाचे वातावरण निर्माण झाले असून आगामी काही दिवसांत परिस्थिती कशी विकसित होते, याकडे राज्याचे लक्ष लागले आहे.
Leave a Reply