पेट्रोल-डिझेल दरवाढीच्या धक्क्यातून अजून सावरत नाही तोच सरकारने सामान्य जनतेला आणखी एक जबरदस्त झटका दिला आहे. घरगुती एलपीजी गॅस सिलिंडरच्या किमतीत थेट ५० रुपयांची वाढ करण्यात आली असून, ही दरवाढ ८ एप्रिलपासून लागू झाली आहे. याआधी उज्ज्वला योजनेअंतर्गत मिळणारा गॅस सिलिंडर ५०३ रुपयांना होता, जो आता ५५३ रुपये झाला आहे. तर या योजनेच्या बाहेर असणाऱ्या ग्राहकांसाठी सिलिंडरची किंमत ८०३ रुपयांवरून थेट ८५३ रुपयांवर पोहोचली आहे. पेट्रोलियम मंत्री हरदीप सिंग पुरी यांनी माध्यमांशी संवाद साधताना सांगितले की, आंतरराष्ट्रीय बाजारातील दरवाढीमुळे ही किंमतवाढ अनिवार्य झाली आहे. स्वयंपाकघरातील सर्वसामान्यांचं बजेट कोलमडवणारी ही वाढ आजपासून अर्थातच ८ एप्रिलपासून लागू करण्यात आली आहे.
| शहर | जुनी किंमत | नवीन किंमत |
| दिल्ली | ₹८०३ | ₹८५३
| मुंबई | ₹८०२.५० | ₹८५२.५०
| कोलकाता | ₹८२९ | ₹८७९
| चेन्नई | ₹८१८ | ₹८६८
| भोपाळ | ₹८०८.५० | ₹८५८.५०
| जयपूर | ₹८०६.५० | ₹८५६.५०
| पाटणा | ₹९०१ | ₹९५१
| रायपूर | ₹८७४ | ₹९२४
सरकारने मागील वर्षी म्हणजे ८ मार्च २०२४ रोजी महिला दिनी सिलिंडरच्या किमतीत १०० रुपयांची कपात केली होती. त्यावेळी दिल्लीत सिलिंडरची किंमत ९०३ रुपये होती. १ एप्रिल रोजी तेल विपणन कंपन्यांनी १९ किलोच्या व्यावसायिक गॅस सिलिंडरच्या किमतीत ४४.५० रुपयांची कपात केली होती. दिल्लीत त्याची किंमत ₹४१ ने कमी होऊन ₹१७६२ झाली. पूर्वी ते ₹१८०३ मध्ये उपलब्ध होते. कोलकातामध्ये ते ₹४४.५० ने कमी होऊन ₹१८६८.५० रुपयांना मिळत आहे, पूर्वी त्याची किंमत ₹१९१३ होती.
Leave a Reply