मालाड पश्चिम येथील उड्डाणपुलावर दुचाकी घसरून झालेल्या अपघातात १६ वर्षीय विद्यार्थ्याचा मृत्यू झाला असून, वाहन चालवणाऱ्या त्याच्या मित्राविरोधात निष्काळजीपणामुळे मृत्यू झाल्याचा गुन्हा नोंदवण्यात आला आहे. हा दुर्दैवी प्रकार ६ एप्रिल रोजी रात्री सुमारे ११.४५ वाजता एमटीएनएल जंक्शनजवळ घडला. रामनवमीच्या उत्सवातून परतत असताना, परम सोनी हा आपल्या मित्र थापासोबत दुचाकीवर प्रवास करत होता. परम मागील आसनावर बसलेला असताना थापाचा वाहनावरील ताबा सुटला आणि दुचाकी घसरून दोघेही रस्त्यावर फेकले गेले. अपघातात दोघेही गंभीर जखमी झाले असून, त्यांच्या मित्रांनी तत्काळ त्यांना कांदिवली येथील शताब्दी रुग्णालयात दाखल केले. मात्र, उपचारादरम्यान दुसऱ्या दिवशी परमचा मृत्यू झाला.
परम सोनी मूळचा गुजरातचा असून, मालाड पूर्वेतील खोत डोंगरी परिसरात आपल्या आई-वडिलांसह व मोठ्या भावासोबत राहत होता. तो दहावीचा विद्यार्थी होता आणि नुकतीच त्याने आपली बोर्ड परीक्षा पूर्ण केली होती. अंत्यसंस्कारासाठी कुटुंबीय गुजरातला गेले होते आणि ते नुकतेच मुंबईत परतले आहेत. या प्रकरणी परमच्या वडिलांनी मालाड पोलिस ठाण्यात तक्रार दाखल केली असून, त्यात त्यांनी नमूद केले की अपघात थापाच्या निष्काळजी आणि बेफिकीर वाहन चालवण्यामुळेच घडला, त्यामुळे त्यांच्या अल्पवयीन मुलाच्या मृत्यूस तोच जबाबदार आहे.
पोलिसांनी या प्रकरणी थापाविरुद्ध भारतीय न्याय संहितेच्या कलम १०६(१) (निष्काळजीपणामुळे मृत्यू), कलम २८१ (निष्काळजी वाहनचालक), आणि मोटार वाहन कायद्यातील कलम १८४ (धोकादायक वाहन चालवणे) अंतर्गत गुन्हा दाखल केला आहे. या अपघाती मृत्यूमुळे स्थानिक परिसरात शोककळा पसरली असून, एका हसऱ्या-खेळत्या अल्पवयीन मुलाच्या अचानक जाण्याने सर्वत्र हळहळ व्यक्त होत आहे.
Leave a Reply