मुंबई : भाजपचे प्रदेश कार्याध्यक्ष रवींद्र चव्हाण यांची लवकरच प्रदेशाध्यक्षपदी नियुक्ती केली जाणार आहे. चंद्रशेखर बावनकुळे यांनी याबाबत दुजोरा दिला आहे. जून महिन्यात त्यांची नियुक्ती केली जाऊ शकते, अशी माहिती मिळतेय. नांदेड येथे गृहमंत्री अमित शाह यांनी रवींद्र चव्हाण यांचा उल्लेख भावी प्रदेशाध्यक्ष असा केला होता आणि आता बावनकुळे यांनी जळगाव येथील पक्षप्रवेशाच्या कार्यक्रमादरम्यान चव्हाण यांच्या नावाची लवकरच घोषणा केली जाईल, असं सांगितलं. देवेंद्र फडणवीस सरकारमध्ये त्यांना मंत्रिपद न मिळाल्याने ते नाराज होते. त्यानंतर चव्हाण यांच्याकडे प्रदेशाध्यक्षपदाची जबाबदारी सोपवली जाणार असल्याची चर्चा सुरु होती.
रवींद्र चव्हाण कोण आहेत?
रविंद्र चव्हाण हे डोंबिवली विधानसभा मतदारसंघाचे प्रतिनिधित्व करतात. ते 2009 पासून सलग 4 वेळा त्यांनी या मतदारसंघातून विजय मिळवला आहे. काही महिन्यांपूर्वी झालेल्या विधानसभा निडवणुकीत त्यांनी 50 हजारांपेक्षा जास्त मताधिक्य मिळवलं होतं. दरम्यान एकनाथ शिंदे यांच्या सरकारमध्ये त्यांनी कॅबिनेट मंत्रिपदाची जबाबदारी स्वीकारली होती. त्यांच्याकडे सार्वजनिक बांधकाम मंत्रालयाची जबाबदारी सोपवण्यात आली होती.
रविंद्र चव्हाण यांच्याकडे भाजपने 2002 साली कल्याण उपजिल्हाध्यक्ष म्हणून जबाबदारी दिली होती. 2005 साली त्यांनी काँग्रेसच्या उमेदवाराचा पराभव करत कल्याण- डोंबिवली महानगरपालिकेत नगरसेवक म्हणू्न प्रवेश मिळवला होता. 2007 मध्ये ते स्थायी समिती सभापती झाले होते. 2009 साली कल्याण विधानसभा मतदारसंघाचे विभाजन होऊन डोंबिवली हा स्वतंत्र मतदारसंघ तयार झाला. त्यानंतर झालेल्या प्रत्येक विधानसभा निवडणुकीत रवींद्र चव्हाण यांनी वर्चस्व मिळवलं आणि मोठा विजय देखील मिळवला. त्यानंतर 2016 साली त्यांना राज्यमंत्री म्हणून मंत्रिमंडळात स्थान देण्यात आले होते. 2019 च्या विधानसभा निवडणुकीत आमदारकी मिळवण्याची हॅटट्रीक पूर्ण केली.
2024 मध्ये पुन्हा 50 हजार मतांच्या फरकाने ते निवडून आले. मात्र पूर्वीच्या सरकारमध्ये सार्वजनिक बांधकाम मंत्रिपद सांभाळलेल्या रवींद्र चव्हाण यांचा मंत्रिमंडळात समावेश करण्यात आला नव्हता. त्यामुळे थोडे नाराज झालेल्या चव्हाण यांच्याकडे प्रदेशाध्यक्षपदाची जबाबदारी सोपवली जाणार असल्याची चर्चा सुरु होती. मात्र त्यांच्यावर कार्यकारी प्रदेश अध्यक्षपदाची जबाबदारी सोपवण्यात आली होती. आता लवकरच भाजप प्रदेशाध्यक्षपदाची माळ त्यांच्या गळ्यात पडणार आहे.
Leave a Reply