राज्यातील नगरपरिषद व नगरपंचायतींच्या निवडणुकांदरम्यान शिवसेना आणि भाजपमध्ये प्रवेशराजकारणावरून निर्माण झालेला तणाव अखेर शांत होण्याची चिन्हे दिसू लागली आहेत. प्रचारकाळात कल्याण–डोंबिवली, उल्हासनगर आणि परिसरात दोन्ही पक्षांतील पदाधिकाऱ्यांच्या प्रवेशामुळे संघर्ष तीव्र झाला होता. याच पार्श्वभूमीवर भाजपचे प्रदेशाध्यक्ष रविंद्र चव्हाण यांनी केलेले विधान महत्त्वाचे मानले जात आहे. “निवडणुका संपल्या की सर्व विसरायचं असतं,” असे म्हणत त्यांनी दोन्ही पक्षांनी एकमेकांच्या पदाधिकाऱ्यांना प्रवेश देऊ नये, असे ठरल्याचे स्पष्ट केले.
निवडणुकीत शिवसेना विरुद्ध भाजप अशी थेट लढत रंगली होती. विशेषतः निलेश राणे, एकनाथ शिंदे आणि संजय शिरसाट यांच्यासोबत चव्हाणांचे नाव वारंवार चर्चेत येत होते. शिवसेनेतील काही युवा पदाधिकाऱ्यांनी भाजपमध्ये प्रवेश केल्याने शिवसेनेत नाराजी वाढली होती. दोन दिवसांपूर्वी तिघा शिवसेना पदाधिकाऱ्यांनी भाजपमध्ये प्रवेश केल्यानंतर ही अस्वस्थता आणखी तीव्र झाली. या विरोधात शिवसेनेचे कल्याण ग्रामीण आमदार राजेश मोरे व शहरप्रमुख राजेश कदम यांनी उघड नाराजी व्यक्त करत चव्हाणांचा निषेधही केला होता.
दरम्यान, या वाढत्या तणावावर महायुतीत वरिष्ठ पातळीवर चर्चा झाली असून वातावरण निवळत असल्याचे चित्र शुक्रवारी दिसले. “कल्याण- डोंबिवली हा संवेदनशील भाग आहे. दोन्ही बाजूंनी काही प्रवेशांवर आक्षेप नोंदवण्यात आले. या गोष्टींवर आता पडदा पडावा,” असे चव्हाण यांनी सांगितले. हिवाळी अधिवेशनादरम्यान या विषयावर पुढील चर्चा होणार असल्याचेही त्यांनी सूचित केले.
महायुतीमध्ये तणाव वाढत असतानाच चव्हाण यांच्या विधानामुळे दोन्ही पक्षांनी प्रवेशराजकारणाला विराम देण्याचे ठरवल्याचे स्पष्ट झाले आहे. मतमोजणीच्या प्रतीक्षेत असताना राजकीय वातावरण शांत करण्याचा हा प्रयत्न महत्त्वपूर्ण ठरणार आहे.
Leave a Reply