रयत शिक्षण संस्था, सातारा आणि जागतिक मराठी अकादमी यांच्या संयुक्त विद्यमाने १० ते १२ जानेवारी २०२५ या कालावधीत छत्रपती शिवाजी कॉलेज, सातारा येथे जागतिक मराठी संमेलन आयोजित करण्यात आले आहे. या संमेलनाचे उद्घाटन राष्ट्रवादी काँग्रेसचे ज्येष्ठ नेते आणि रयत शिक्षण संस्थेचे अध्यक्ष खासदार शरद पवार यांच्या हस्ते १० जानेवारी रोजी होणार आहे. संमेलनाच्या अध्यक्षपदी ज्येष्ठ विचारवंत डॉ. आ. ह. साळुंखे यांची निवड करण्यात आली आहे.
जागतिक मराठी अकादमीचे अध्यक्ष आणि प्रसिद्ध वात्रटिकाकार रामदास फुटाणे तसेच संमेलनाचे स्वागताध्यक्ष आणि रयत शिक्षण संस्थेचे चेअरमन चंद्रकांत दळवी यांनी पत्रकार परिषदेत संमेलनाच्या आयोजनाबाबत सविस्तर माहिती दिली.
रामदास फुटाणे यांनी सांगितले की, “१९८९ साली जागतिक मराठी परिषद स्थापन करण्यात आली. या संस्थेचा मुख्य उद्देश जागतिक स्तरावर मराठी भाषिकांना एकत्र आणणे, मराठी भाषा व संस्कृतीचे संवर्धन करणे आणि विविध क्षेत्रांतील मराठी माणसाच्या प्रगतीसाठी प्रेरणा देणे हा आहे. याच उद्दिष्टाला अनुसरून ‘शोध मराठी मनाचा २०२५’ या सूत्रावर आधारित २० वे जागतिक मराठी संमेलन साकारले जात आहे.”
संमेलनाचे वैशिष्ट्यपूर्ण कार्यक्रम
या संमेलनात महाराष्ट्राच्या विविध भागांतून ३,००० ते ३,५०० विद्यार्थी, अभ्यासक आणि नागरिक सहभागी होणार आहेत. उद्घाटन समारंभात खासदार शरद पवार आणि डॉ. आ. ह. साळुंखे यांच्या प्रमुख उपस्थितीत विशेष पुरस्कार वितरण सोहळा पार पडणार आहे.
महत्त्वाचे सन्मान
• ‘जागतिक मराठी भूषण २०२५’ पुरस्कार: बीव्हीजी ग्रुपचे अध्यक्ष हनुमंतराव गायकवाड यांना या प्रतिष्ठित पुरस्काराने गौरवण्यात येणार आहे.
• ‘जागतिक मराठी गौरव पुरस्कार’: ज्येष्ठ संपादक राजीव खांडेकर यांना ‘विवा चॅरिटेबल ट्रस्ट’ पुरस्कृत सन्मान, २५,००० रुपये रोख व सन्मानचिन्हासह प्रदान करण्यात येईल.
विद्यार्थ्यांसाठी सुवर्णसंधी
या तीन दिवसीय संमेलनात विविध क्षेत्रातील तज्ज्ञ आणि विचारवंत उद्योग, व्यवसाय, आरोग्य, शिक्षण, सामाजिक, राजकीय आणि सांस्कृतिक क्षेत्रांतील संधींबाबत मार्गदर्शन करतील. सहभागी विद्यार्थ्यांना त्यांच्या भविष्य घडवण्यासाठी उत्तम संधी मिळेल, असे जागतिक मराठी अकादमीचे कार्यकारिणी सदस्य आणि महाराष्ट्र रिसर्च सेंटरचे संचालक महेश म्हात्रे यांनी सांगितले.
संमेलनाचे ठळक उद्दिष्ट
मराठी भाषा, संस्कृती आणि विचारधारेचा जागतिक स्तरावर प्रचार व प्रसार करण्याचे मुख्य उद्दिष्ट असलेल्या या संमेलनामुळे मराठी माणसाला नवी ऊर्जा मिळेल, असा आशावाद कविवर्य रामदास फुटाणे यांनी व्यक्त केला आहे.
Leave a Reply