मुंबई पोलिसांना टोरेस पोंझी योजनेशी संबंधित मोठ्या फसवणुकीच्या प्रकरणात मोठे यश मिळाले आहे. ज्वेलरी ब्रँडच्या नावाखाली हजारो गुंतवणूकदारांची फसवणूक करणाऱ्या ८ युक्रेनियन आणि १ तुर्की नागरिकांविरोधात इंटरपोलने ब्लू कॉर्नर नोटीस जारी केली आहे. या प्रकरणात सुरुवातीला १.२५ लाख गुंतवणूकदारांचे जवळपास ₹१,००० कोटींचे नुकसान झाल्याचा दावा करण्यात आला होता.
मुंबई पोलिसांच्या आर्थिक गुन्हे शाखेने (EOW) या गुन्ह्याचा तपास करताना इंटरपोलच्या माध्यमातून सीबीआयच्या मदतीने या विदेशी आरोपींविरोधात ब्लू कॉर्नर नोटीस जारी केली आहे. इंटरपोलच्या ब्लू नोटीसीद्वारे, संशयितांचे ठिकाण, ओळख किंवा त्यांच्या हालचालींविषयी अधिक माहिती गोळा करण्याचा उद्देश असतो. टोरेस ब्रँडच्या माध्यमातून फसवणूक करणाऱ्या या प्रकरणातील प्रमुख आरोपी ओलेना स्टोयान, व्हिक्टोरिया कोवालेन्को, मुस्तफा काराकोक (तुर्की), ऑलेक्सँडर बोरोव्यक, ऑलेक्सँडर झापिचेन्को, ऑलेक्सान्ड्रा ब्रुनकिव्स्का, ऑलेक्सान्ड्रा ट्रेडोखिब, आर्टेम ऑलिफरचेन्को यांच्यावर गुन्हे दाखल करण्यात आले आहेत.
टोरेस ज्वेलरी ब्रँडच्या नावाखाली साप्ताहिक उच्च परतावा देण्याचे आमिष दाखवून लोकांकडून मोठ्या प्रमाणावर पैसे गुंतवले गेले. सुरुवातीला आकर्षक परतावे देऊन विश्वास जिंकण्यात आला. मात्र, डिसेंबर २०२४ अखेरीस वचन दिलेले व्याज थांबले आणि गुंतवणूकदारांची फसवणूक उघड झाली.
तपासातील महत्त्वाचे मुद्दे:
• आरोपींनी परदेशात ₹२०० कोटींचे मनी लॉन्डरिंग केल्याचा संशय आहे.
• हवाला चॅनेलच्या माध्यमातून रोख रक्कम परदेशात पाठवण्यात आल्याचे प्राथमिक तपासात समोर आले आहे.
• आरोपींनी रोख रक्कम क्रिप्टोकरन्सीमध्ये रूपांतरित केली आणि ती परदेशी बँक खात्यांमध्ये वळवली.
आतापर्यंत ४,००० गुंतवणूकदारांनी ₹५७ कोटींच्या फसवणुकीची तक्रार नोंदवली आहे. EOW ने तपासादरम्यान ₹२० कोटींची मालमत्ता आणि रोख जप्त केली आहे. याशिवाय, आरोपी कंपनीचे महाव्यवस्थापक तानिया क्साटोवा, संचालक सर्वेश सुर्वे आणि स्टोअर प्रभारी व्हॅलेंटिना गणेश कुमार यांना अटक करण्यात आली आहे.
Leave a Reply