मुंबई : महाराष्ट्र नवनिर्माण सेना (मनसे) आणि महाविकास आघाडी (मविआ) यांच्या संयुक्त नेतृत्वाखाली आज मुंबईत “सत्याचा मोर्चा” काढण्यात आला. मतदार याद्यांमधील घोळ, दुबार मतदार, बनावट नोंदी आणि संभाव्य मतचोरीच्या आरोपांवरून या मोर्च्याचे आयोजन करण्यात आले. या मोर्च्यात शरद पवार , उद्धव ठाकरे, राज ठाकरे, सुप्रिया सुळे यांसह विरोधी पक्षांचे अनेक नेते सहभागी झाले.
दुपारी १ वाजता साऊथ मुंबईतील फॅशन स्ट्रीटपासून निघालेला हा मोर्चा बृहन्मुंबई महानगरपालिका (BMC) मुख्यालयाकडे गेला. मोर्च्याच्या मार्गावर मुंबई पोलिसांनी मोठ्या प्रमाणावर सुरक्षा व्यवस्था केली होती. फॅशन स्ट्रीट, आझाद मैदान परिसर, तसेच छत्रपती शिवाजी महाराज टर्मिनस परिसरात वाहतूक बंदी आणि पर्यायी मार्गांची व्यवस्था करण्यात आली. पोलिसांनी सांगितले की, मोर्चाला अद्याप अधिकृत परवानगी मिळालेली नसली तरी आंदोलकांना कोणतीही गोंधळाची परिस्थिती निर्माण करू नये, असे आवाहन करण्यात आले आहे.
मोर्चादरम्यान राज ठाकरे यांनी निवडणूक आयोगावर थेट निशाणा साधत म्हटले की, “राज्यात लाखो दुबार आणि बनावट मतदार आहेत. हे लोकशाहीसाठी गंभीर संकट आहे.” त्यांनी यावेळी काही मतदारसंघातील नावांची यादी सादर करून गैरव्यवहार उघड केल्याचा दावा केला. उद्धव ठाकरे यांनीही मोठा खुलासा करत सांगितले की, “माझ्या नावाने आणि मोबाईल क्रमांकाने निवडणूक आयोगाकडे बनावट अर्ज दाखल करण्यात आला होता. हे लोकशाही प्रक्रियेवरील हल्ला आहे.”
शरद पवार यांनी निवडणूक आयोगाने तात्काळ तपास करून मतदारयादीतील त्रुटी दूर कराव्यात, अशी मागणी केली. सुप्रिया सुळे यांनी महिलांच्या सहभागाबद्दल विशेष भाष्य करत “लोकशाही टिकवण्यासाठी प्रत्येक मतदाराने जागरूक राहणे गरजेचे आहे,” असे सांगितले.
दुसरीकडे, आमदार अमोल मिटकरी यांनी या मोर्च्याला “महाराष्ट्राची हास्यजत्रा” असे संबोधत टीका केली. परंतु, मविआ आणि मनसे या दोन्ही भिन्न विचारधारेच्या पक्षांनी एका मंचावर येऊन आंदोलन केल्यामुळे या मोर्च्याला मोठे राजकीय महत्त्व प्राप्त झाले आहे.
राज्यभरातील मतदार याद्यांवरील घोळाचा मुद्दा सध्या राजकीय चर्चेचा केंद्रबिंदू बनला आहे. या मोर्च्यामुळे निवडणूक आयोग आणि प्रशासनावर दबाव वाढला असून, आगामी बीएमसी निवडणुकांपूर्वी मतदार नोंदणी प्रक्रियेत सुधारणा करण्याची मागणी जोर धरत आहे.
“सत्याचा मोर्चा” हा केवळ विरोधकांचा निषेध नव्हे, तर लोकशाहीतील पारदर्शकता आणि मतदारांच्या अधिकारासाठीची लढाई ठरू पाहतो. या आंदोलनानंतर निवडणूक आयोग कोणती पावले उचलतो, यावर पुढील राजकीय समीकरणे ठरण्याची शक्यता आहे.
Leave a Reply