सोलापूर: सोलापूर-मुंबई सीएसएमटी वंदे भारत एक्स्प्रेसच्या प्रवाशांसाठी एक आनंदाची बातमी आहे. रेल्वे प्रशासनाने या गाडीला चार अतिरिक्त डबे जोडण्याचा महत्त्वपूर्ण निर्णय घेतला आहे. यामुळे आता ही गाडी १६ ऐवजी २० डब्यांची होणार असून, ३९२ अतिरिक्त प्रवाशांना प्रवासाची संधी मिळणार आहे. हा निर्णय २८ ऑगस्ट २०२५ पासून लागू होणार आहे. यामुळे सोलापूर, पुणे आणि मुंबई दरम्यान प्रवास करणाऱ्या प्रवाशांना वेटिंग लिस्टची चिंता करावी लागणार नाही.
प्रवाशांचा वाढता प्रतिसाद
सोलापूर-मुंबई सीएसएमटी वंदे भारत एक्सप्रेस (क्र. २२२२६) १० फेब्रुवारी २०२३ रोजी सुरू झाली. सुरुवातीपासूनच या गाडीला प्रवाशांचा चांगला प्रतिसाद मिळत आहे. सध्या ही गाडी माडगून, नाशिकरोड, मनमाड, संभाजीनगर, जालना, आणि नांदेड या मार्गावरून जाते. नांदेडहून येणारी वंदे भारत मुंबईतून सोलापूरला येते. प्रवाशांची वाढती मागणी लक्षात घेऊन रेल्वे प्रशासनाने हा निर्णय घेतला आहे.
नवीन वेळापत्रक
सीएसएमटी मुंबई-सोलापूर वंदे भारत एक्स्प्रेस (क्र. २२२२५) मध्ये २८ ऑगस्टपासून, तर सोलापूर-सीएसएमटी मुंबई वंदे भारत एक्स्प्रेस (क्र. २२२२६) मध्ये २९ ऑगस्टपासून चार अतिरिक्त डबे जोडले जातील.
सुधारित कोच रचना आणि वाढलेली
आसनक्षमता
सुधारित रचनेनुसार, २० डब्यांमध्ये १ एक्झिक्युटिव्ह चेअर कार असेल, ज्यात ५२ आसनक्षमता असेल. १६ चेअर कारमध्ये प्रत्येकी ८८ आसनक्षमता असतील. तसेच, लोको पायलट आणि गार्ड केबिनजवळच्या २ चेअर कारमध्ये प्रत्येकी ४४ आसनक्षमता असतील. या बदलांमुळे गाडीची एकूण आसनक्षमता १,४४० होणार आहे.
वेटिंगचे प्रमाण घटणार
रेल्वेच्या वरिष्ठ विभागीय व्यवस्थापक योगेश पाटील यांनी सांगितले की, प्रशासनाने दिलेल्या या नवीन सुविधांचा प्रवाशांनी जास्तीत जास्त लाभ घ्यावा. सोलापूरहून मुंबई आणि पुणे येथे जाणाऱ्या प्रवाशांना सिद्धेश्वर आणि हुतात्मा एक्स्प्रेसमध्ये अनेकदा वेटिंगवर राहावे लागत होते. तसेच, कामासाठी प्रवास करणाऱ्या लोकांना खात्रीचे तिकीट मिळण्यास मदत होईल. प्रवासी सेवा संघाचे अध्यक्ष संजय पाटील यांनीही या निर्णयाचे स्वागत केले.
Leave a Reply