मुंबई महापालिकेचा २०२५-२६ या आर्थिक वर्षासाठीचा अर्थसंकल्प आज, ४ फेब्रुवारी रोजी सादर करण्यात आला. सकाळी ११ वाजता महापालिका आयुक्त भूषण गगराणी यांनी हा अर्थसंकल्प सादर केला. यंदाचा महापालिकेचा ५९,९५४.७५ कोटी रुपये इतका भव्य बजेट आहे, जो देशातील अनेक राज्यांच्या अर्थसंकल्पांपेक्षा मोठा आहे. मुंबई महानगरपालिकेने मुंबईकरांसाठी रस्ते, पाणी, वाहतूक, आरोग्य, शिक्षण, पर्यटन यांसारख्या विविध सुविधांसाठी मोठ्या प्रमाणात तरतूद केली आहे. चला, यंदाच्या अर्थसंकल्पातील महत्त्वाचे मुद्दे जाणून घेऊया!
यंदाच्या अर्थसंकल्पात १४% वाढ!
२०२५-२६ च्या अर्थसंकल्पात मागील वर्षाच्या तुलनेत १४.१९% वाढ झाली आहे. महापालिकेचे डिसेंबर २०२४ पर्यंतचे एकूण उत्पन्न २८,३०८ कोटी रुपये होईल, असा अंदाज आहे. या उत्पन्नात जकात, विकास शुल्क आणि मालमत्ता कर यांचा मोठा वाटा आहे. विशेषतः मुंबईच्या पायाभूत सुविधांसाठी ४३,१६२ कोटी रुपये खर्च करण्याचा महत्त्वाचा निर्णय घेण्यात आला आहे.
महानगरपालिकेसाठी अतिरिक्त निधी
राज्य सरकारने २५:७५ च्या प्रमाणात अतिरिक्त एफएसआय प्रीमियमपैकी २५% रक्कम बीएमसीला देण्याचे आदेश दिले आहेत. यामुळे महापालिकेला ७० कोटी रुपयांची अतिरिक्त रक्कम मिळाली असून, पुढील वर्षभरात ३०० कोटी रुपयांपर्यंत हे योगदान पोहोचण्याची शक्यता आहे.
शाळांमधील विद्यार्थ्यांना टॅब्लेटचे वाटप
बृहन्मुंबई महानगरपालिकेच्या (BMC) शाळांमध्ये गेमिफाइड लर्निंग उपक्रमाचा विस्तार केला जाणार आहे. याअंतर्गत ८ वी आणि ९ वीमधील ३२,६५९ विद्यार्थ्यांना टॅब्लेट दिले जाणार आहेत. हा उपक्रम सुरुवातीला १९,४०१ विद्यार्थ्यांपर्यंत मर्यादित होता, पण आता त्याचा लाभ अधिक विद्यार्थ्यांना मिळणार आहे.
बेस्ट उपक्रमासाठी भरीव आर्थिक मदत
बीएमसीने बेस्ट उपक्रमाला मोठे आर्थिक सहाय्य देण्याचा निर्णय घेतला आहे. २०१२-१३ ते जानेवारी २०२५ पर्यंत बृहन्मुंबई महानगरपालिका
ने बेस्ट ला ११,३०४.५९ कोटी रुपयांची मदत दिली आहे. यंदाच्या अर्थसंकल्पात BEST साठी १,००० कोटी रुपयांचे अनुदान प्रस्तावित करण्यात आले आहे.
पर्यावरण रक्षणासाठी पुढाकार
संजय गांधी राष्ट्रीय उद्यानातील जीएमएलआर बोगद्यात वाघांचे स्मारक उभारण्याची योजना बीएमसीने आखली आहे. यासाठी ११३ कोटी रुपयांचा निधी मंजूर करण्यात आला आहे.
कोणत्या विभागाला किती निधी?
मुंबईतील पायाभूत सुविधा आणि नागरी विकासासाठी खालील प्रमाणे तरतूद करण्यात आली आहे –
१) कोस्टल रोड प्रकल्प – ५८०७ कोटी रुपये
२) सांडपाणी प्रक्रिया प्रकल्प – ५५४५ कोटी रुपये
३) रस्ते विकास – ५१०० कोटी रुपये
४) पाणीपुरवठा सुधारणा – ५४०० कोटी रुपये
५) आरोग्य सेवा – २१७२ कोटी रुपये
६) नवीन पूल आणि उड्डाणपूल – १९८० कोटी रुपये
७) घनकचरा व्यवस्थापन – ४९९ कोटी रुपये
८) शाळा दुरुस्ती आणि सुविधा सुधारणा – ४११ कोटी रुपये
गेल्या ५ वर्षांतील BMC चा अर्थसंकल्प
• २०२०-२१ – ३३,००० कोटी रुपये
• २०२१-२२ – ३९,००० कोटी रुपये
• २०२२-२३ – ४५,९४९.२१ कोटी रुपये
• २०२३-२४ – ५२,६१९.०७ कोटी रुपये
• २०२४-२५ – ५९,९५४ कोटी रुपये
Please follow and like us:
Leave a Reply