मुंबई महाराष्ट्र रिअल इस्टेट रेग्युलेटरी अथॉरिटी (महारेरा) अंतर्गत राज्यातील गृहनिर्माण प्रकल्पांची नियमित माहिती अद्यतनित करणाऱ्या विकासकांच्या संख्येत लक्षणीय वाढ झाली आहे. विकासक तिमाही प्रगती अहवाल (क्यूपीआर) सादर करत असून, यामुळे गृहनिर्माण प्रकल्पांची पारदर्शकता आणि ग्राहकांचा विश्वास वाढत आहे.
महारेराच्या आकडेवारीनुसार, सध्या राज्यातील १८,०१२ सक्रिय गृहनिर्माण प्रकल्पांपैकी ११,०८० प्रकल्प (६२%) नियमितपणे क्यूपीआर अपडेट करतात. जानेवारी २०२३ मध्ये जेव्हा महारेराने प्रकल्प तपशीलांचे पुनरावलोकन सुरू केले होते, त्यावेळी ही संख्या केवळ ०.०२% इतकी कमी होती.
महारेराच्या अनुपालन कक्षाने विकासकांना प्रकल्प अहवाल सादर करण्यास प्रवृत्त करण्यासाठी कठोर उपाययोजना केल्या. सेमिनारचे आयोजन, कायदेशीर कारवाई, दंडात्मक कारवाई, विक्री स्थगिती, तसेच अनुपालन न करणाऱ्या प्रकल्पांचे बँक खाती गोठवणे आणि नोंदणी क्रमांक निलंबित करणे या उपाययोजनांमुळे नियमांचे पालन करणाऱ्या प्रकल्पांची संख्या झपाट्याने वाढली.
सुरुवातीला ७४८ पैकी फक्त २ प्रकल्प (०.०२%) क्यूपीआर आवश्यकतांचे पालन करत होते, परंतु कठोर अंमलबजावणीमुळे आज हा आकडा ६२% पर्यंत पोहोचला आहे. तिमाही प्रगती अहवालांमध्ये बांधकामाच्या टप्प्यांची माहिती, आर्थिक तपशील आणि इतर महत्त्वपूर्ण बाबी समाविष्ट असतात, ज्यामुळे घर खरेदीदारांना त्यांच्या गुंतवणुकीबाबत स्पष्ट माहिती मिळते. विकासकांनी वेळेत क्यूपीआर सादर केल्याने घर खरेदीदारांच्या तक्रारींमध्येही मोठी घट झाली आहे.
Leave a Reply