गोरेगाव येथील प्रतिष्ठित फिल्म सिटीच्या प्रवेशद्वाराजवळील संतोष नगर झोपडपट्टीत गुरुवारी सायंकाळी मोठी आग लागली. या आगीत सुमारे १५० ते २०० झोपड्या जळून खाक झाल्या असल्या तरी सुदैवाने कोणतीही जीवितहानी झालेली नाही, अशी माहिती नागरी अधिकाऱ्यांनी दिली.
ही आग संध्याकाळी सुमारे ७:३० वाजता लागली. घटनेची माहिती मिळताच अग्निशमन दलाच्या सात गाड्या आणि अन्य उपकरणे तातडीने घटनास्थळी पाठवण्यात आली. अग्निशमन दलाच्या शर्तीच्या प्रयत्नांमुळे आग सर्व बाजूंनी नियंत्रणात आणण्यात आली असून, संपूर्णपणे विझवण्याचे काम सुरू आहे.
या आगीत अनेक कुटुंबांचे संसार उघड्यावर पडले आहेत. या पार्श्वभूमीवर बृहन्मुंबई महानगरपालिकेने (BMC) तत्काळ मदतकार्य राबवत गोकुळधाम महानगरपालिका शाळेत सुमारे २०० ते २५० रहिवाशांसाठी तात्पुरत्या निवाऱ्याची आणि जेवणाची व्यवस्था केली आहे. तसेच सर्व संबंधित यंत्रणा आणि १०८ रुग्णवाहिका सेवा घटनास्थळी तैनात करण्यात आली आहे. या आगीचे नेमके कारण अद्याप स्पष्ट झालेले नसून, अधिकृत तपास सुरू आहे.
Leave a Reply