पंतप्रधान नरेंद्र मोदी यांनी रविवारी महाकुंभवर टीका करणाऱ्या नेत्यांना कडाडून उत्तर दिले. भारतीय धार्मिक आणि सांस्कृतिक परंपरांवर वार करणारे हे लोक मानसिक गुलामगिरीत अडकले असून, परदेशी शक्तींच्या पाठिंब्याने देशातील संस्कृती आणि परंपरांचा अवमान करत आहेत, अशी जोरदार टीका त्यांनी केली. मध्य प्रदेशातील छतरपूर येथे बागेश्वर धाम वैद्यकीय आणि विज्ञान संशोधन केंद्र तसेच कर्करोग रुग्णालयाच्या उद्घाटनाच्या वेळी पंतप्रधान मोदी बोलत होते. त्यांनी प्रयागराजमध्ये सुरू असलेल्या महाकुंभाला ‘एकतेचा महाकुंभ’ असल्याचे ठामपणे प्रतिपादन केले.
महाकुंभला ‘मृत्यू कुंभ’ म्हणणाऱ्यांवर टीका
पश्चिम बंगालच्या मुख्यमंत्री ममता बॅनर्जी यांनी महाकुंभातील व्यवस्थापनावर टीका करत, चेंगराचेंगरीच्या घटनांचा दाखला देत महाकुंभला ‘मृत्यू कुंभ’ असे संबोधले होते. या वादाच्या पार्श्वभूमीवर पंतप्रधान मोदींनी हे परखड वक्तव्य केले.
“आजकाल आपल्या धर्माचा अवमान करणाऱ्यांचा एक गट सक्रिय झाला आहे. हे लोक समाजात फूट पाडण्याचा प्रयत्न करत असून, परदेशी शक्ती त्यांना अप्रत्यक्ष पाठिंबा देतात. त्यांच्या या कारवायांनी देश आणि धर्म कमजोर करण्याचा कट स्पष्ट दिसतो.”
मोदींनी स्पष्ट शब्दांत सांगितले की, हिंदू धर्माचा द्वेष करणारे हे लोक शतकानुशतके वेगवेगळ्या वेशात समोर येत आहेत. त्यांची मानसिकता गुलामगिरीने ग्रासलेली असून, ते सतत मठ-मंदिरांवर, संतांवर, संस्कृतीवर आणि तत्त्वज्ञानावर प्रहार करतात.
“हे लोक आपले सण, परंपरा आणि चालीरीतींना वाकवून त्याचा गैरवापर करतात. हिंदू संस्कृती पुरोगामी असूनही तिच्यावर चिखलफेक करण्याचे धाडस हे लोक दाखवतात. समाजात फूट पाडणे आणि त्याची एकता तोडणे हाच त्यांचा खरा अजेंडा आहे,” असेही मोदींनी ठणकावून सांगितले.
Leave a Reply