ढाका बांगलादेशमध्ये माजी पंतप्रधान शेख हसीना यांच्या विरोधात उभारलेल्या विद्यार्थी आंदोलनाचा नवा टप्पा समोर आला आहे. आंदोलनात महत्त्वाची भूमिका बजावलेल्या विद्यार्थ्यांनी नवीन राजकीय पक्षाची स्थापना केली असून, तो सध्याच्या राजकीय संघर्षातील एक महत्त्वाचा गट ठरणार आहे.
‘गणतांत्रिक छात्र संसद’ (डेमोक्रॅटिक स्टुडंट कौन्सिल) असे या पक्षाचे नाव असून, गेल्या ऑगस्टमध्ये हसीना यांना सत्तेवरून हटवणाऱ्या ‘स्टुडंट्स अगेन्स्ट डिस्क्रिमिनेशन’ (एसएडी) गटातील प्रमुख सदस्य त्याचा भाग आहेत.
बांगलादेशचे राजकारण हे अत्यंत तणावपूर्ण व विभाजित स्वरूपाचे आहे. नवीन गटाच्या स्थापनेदरम्यानच सदस्यांमध्ये मतभेद निर्माण झाले. बुधवारी पक्षाच्या अधिकृत घोषणेदरम्यान प्रतिनिधित्वाच्या मुद्यावरून वाद वाढले आणि सदस्यांमध्ये हाणामारी झाली.
हसीना यांच्या भारतातील निर्वासित जीवनानंतर सत्तेवर आलेल्या अंतरिम सरकारमधील काही सदस्य आणि ‘एसएडी’ मधील इतर नेतेही लवकरच वेगळ्या पक्षाची घोषणा करणार असल्याचे संकेत आहेत.
नवीन पक्षात अवामी लीगच्या युवा शाखेतील काही माजी विद्यार्थी सदस्यांचा समावेश आहे. मात्र, या पक्षाच्या नेतेपदी असलेल्या जाहिद अहसान यांनी स्पष्ट केले की, “या सदस्यांनी मागील आंदोलनात कोणत्याही हिंसक कृत्यात भाग घेतलेला नाही, याची आम्ही खात्री केली आहे.” गणतांत्रिक छात्र संसद हा विद्यार्थी हक्कांच्या संरक्षणासाठी लढणार असल्याचा दावा करत आहे. “आम्हाला क्रांतीदरम्यानची ऊर्जा आणि भावना टिकवून ठेवायची आहे,” असे अहसान यांनी सांगितले.
दरम्यान, शेख हसीना यांच्यावर मानवतेविरुद्ध गुन्हे केल्याचा आरोप असून, त्या ढाका येथील अटक वॉरंटला सामोरे जाण्यास टाळाटाळ करत आहेत. विद्यार्थी गटांमधील संघर्ष दिवसेंदिवस वाढत असून, या महिन्यात झालेल्या हिंसाचारात १५० हून अधिक विद्यार्थी जखमी झाले आहेत.
नोबेल पुरस्कार विजेते आणि काळजीवाहू सरकारचे नेतृत्व करणारे मुहम्मद युनूस यांनी अंदाज व्यक्त केला आहे की, सार्वत्रिक निवडणुका २०२५ च्या शेवटी किंवा २०२६ च्या सुरुवातीला होऊ शकतात. या निवडणुकीत दीर्घकाळ शेख हसीना यांच्या विरोधात असलेला बांगलादेश नॅशनलिस्ट पार्टी महत्त्वाची भूमिका बजावेल, अशी शक्यता आहे.
Leave a Reply