महाराष्ट्र शासनाच्या सांस्कृतिक कार्य विभागातर्फे दिल्या जाणाऱ्या मानाच्या चित्रपट पुरस्कारांची घोषणा आज सांस्कृतिक कार्य मंत्री ॲड. आशिष शेलार यांनी पत्रकार परिषदेत केली. यंदा चित्रपती व्ही. शांताराम, स्व. राज कपूर व गानसम्राज्ञी लता मंगेशकर या तीन प्रतिष्ठित पुरस्कारांच्या विविध गटांमध्ये पाच नामांकित कलावंतांचा सन्मान होणार आहे.
महेश मांजरेकर यांना जीवनगौरवाचा मान
यंदाचा चित्रपती व्ही. शांताराम जीवन गौरव पुरस्कार अभिनेता, दिग्दर्शक आणि निर्माता म्हणून ओळख असलेल्या महेश मांजरेकर यांना जाहीर करण्यात आला आहे. या पुरस्कारामध्ये ₹10 लाख रोख रक्कम, स्मृतीचिन्ह, मानपत्र आणि चांदीचे पदक दिले जाते.
मुक्ता बर्वेच्या योगदानास मान्यता
चित्रपती व्ही. शांताराम विशेष योगदान पुरस्कार यंदा प्रतिभावान अभिनेत्री मुक्ता बर्वे यांना देण्यात येणार आहे. या पुरस्काराचे स्वरूप ₹6 लाख रोख रक्कम, स्मृतीचिन्ह, मानपत्र आणि चांदीचे पदक असे आहे.
राज कपूर पुरस्कारांचा गौरव हिंदी सिनेमाला
हिंदी चित्रपटसृष्टीतील प्रतिष्ठेचा स्व. राज कपूर जीवन गौरव पुरस्कार यंदा ज्येष्ठ अभिनेता अनुपम खेर यांना जाहीर झाला आहे. तर स्व. राज कपूर विशेष योगदान पुरस्कार यंदा अष्टपैलू अभिनेत्री काजोल देवगण यांना दिला जाणार आहे. हे पुरस्कार अनुक्रमे ₹10 लाख व ₹6 लाख रोख रक्कम, मानपत्र, स्मृतीचिन्ह आणि पदकासह दिले जातात. 1993 पासून देण्यात येणारा गानसम्राज्ञी लता मंगेशकर पुरस्कार यावर्षी मराठीतील ज्येष्ठ गझल गायक भीमराव पांचाळे यांना प्रदान करण्यात येणार आहे. हा पुरस्कार ₹ 10 लाख रोख रक्कम, मानचिन्ह, मानपत्र व शाल यांसह दिला जातो.
पुरस्कार वितरण सोहळा आणि खास संगीत कार्यक्रम
या सर्व पुरस्कारांचे वितरण २५ एप्रिल २०२५ रोजी मुंबईतील एन.एस.सी.आय. डोम येथे एका भव्य सोहळ्यात होणार आहे.याशिवाय, संविधान अमृत महोत्सव व भारतरत्न डॉ. बाबासाहेब आंबेडकर जयंती निमित्त २० एप्रिल २०२५ रोजी सायंकाळी ६.३० वाजता गेटवे ऑफ इंडिया येथे एक खास सांगीतिक मानवंदना कार्यक्रम आयोजित करण्यात आला आहे. या कार्यक्रमात सुरेश वाडकर, आदर्श शिंदे, वैशाली सामंत, उर्मिला धनगर व नंदेश उमक यांच्या गायनाच्या सादरीकरणाने सजलेला हा सांगीतिक सोहळा असेल, तर सुंदर सूत्रसंचालन अभिनेता सुबोध भावे करणार आहेत. कार्यक्रमात डॉ.बाबासाहेब आंबेडकर यांच्या जीवनावर आधारित गीतं, नाट्यप्रवेश व नृत्य सादर केले जातील.हा कार्यक्रम सर्वांसाठी खुला असून, सन्मानिका प्रवेशपत्रे शिवाजी नाट्य मंदिर व रवींद्र नाट्य मंदिर येथे ‘प्रथम येणाऱ्यास प्राधान्य’ या तत्त्वावर वितरित केली जातील, अशी माहिती सांस्कृतिक कार्य मंत्री ॲड.शेलार यांनी या पत्रकार परिषदेतून दिली.
Leave a Reply