दिल्ली : विरोधी पक्षनेते राहुल गांधी यांची बदनामी केल्याबद्दल आणि काँग्रेसला तुर्कीशी जोडल्याबद्दल भारतीय युवा काँग्रेसच्या कायदेशीर विभागाने भाजप आयटी सेलचे प्रमुख अमित मालवीय यांच्याविरुद्ध अजामीनपात्र कलमांखाली एफआयआर दाखल केला आहे. भारतीय युवा काँग्रेसचे राष्ट्रीय प्रभारी कृष्णा अल्लावरू, राष्ट्रीय अध्यक्ष उदय भानू चिब आणि कायदेशीर विभागाचे राष्ट्रीय अध्यक्ष रूपेश भदौरिया यांच्या सूचनेवरून हा एफआयआर नोंदवण्यात आला आहे. भारतीय युवा काँग्रेसचे राष्ट्रीय अध्यक्ष उदय भानू चिब म्हणाले की, काँग्रेस पक्षाला बदनाम करण्याचा, अशांतता पसरवण्याचा आणि राष्ट्रीय सुरक्षेला हानी पोहोचवण्याचा हा दुर्भावनापूर्ण प्रयत्न लोकशाहीवर थेट हल्ला आहे. आम्ही गप्प बसणार नाही. या एफआयआरद्वारे, आम्ही एक स्पष्ट संदेश देऊ इच्छितो की आमच्या पक्षाविरुद्ध किंवा त्यांच्या नेतृत्वाविरुद्ध खोट्या बातम्या पसरवण्याचा कोणताही प्रयत्न केल्यास कायदेशीर आणि राजकीयदृष्ट्या कठोरपणे प्रतिसाद दिला जाईल.
राष्ट्रीय अध्यक्ष रुपेश भदौरिया म्हणतात…
युवक काँग्रेसच्या कायदेशीर विभागाचे राष्ट्रीय अध्यक्ष रूपेश भदोरिया म्हणाले की, आम्ही भाजप आयटी सेलचे प्रमुख अमित मालवीय आणि रिपब्लिक टीव्हीचे मुख्य संपादक अर्णब गोस्वामी यांच्याविरुद्ध विरोधी पक्षनेते राहुल गांधी यांच्या संवैधानिक पदाची बदनामी केल्याबद्दल अजामीनपात्र कलमांखाली एफआयआर दाखल केला आहे. काँग्रेस नेतृत्वाची बदनामी करण्यासाठी आणि अशांतता भडकवण्यासाठी त्यांनी सुरू केलेल्या अविरत मोहिमेने सभ्यता आणि कायदेशीरपणाच्या सर्व मर्यादा ओलांडल्या आहेत.
एफआयआरमध्ये दोघांवरही बनावट बातम्या पसरवणे, द्वेष पसरवणे आणि राष्ट्रीय सुरक्षा धोक्यात आणणे असे गंभीर आरोप करण्यात आले आहेत. खोट्या बातम्या पसरवणाऱ्या, आपल्या नेत्यांची बदनामी करणाऱ्या आणि लोकशाहीवर हल्ला करणाऱ्यांना हा इशारा आहे, त्यांचे कठोर कायदेशीर आणि राजकीय परिणाम होतील.
राहुल गांधींची तुलना मीर जाफरशी केली
भाजप आयटी सेलचे प्रमुख अमिल मालवीय यांनी राहुल गांधींची तुलना मीर जाफरशी करताना सोशल मीडियावर लिहिले होते की, राहुल गांधींना निशाण-ए-पाकिस्तान देण्यात यावा. ज्याबाबत काँग्रेसने काल घोषणा केली होती की ते लवकरच त्यांच्याविरुद्ध मानहानीचा खटला दाखल करणार आहेत. याबद्दल काँग्रेस नेते जयराम रमेश यांनी त्यांच्या सोशल मीडिया प्लॅटफॉर्म X वर लिहिले की, “सत्य आणि सभ्यतेवर कलंक असलेल्या दोन व्यक्तींविरुद्ध काँग्रेस पक्ष दिवाणी आणि फौजदारी कायद्यांतर्गत कारवाई सुरू करत आहे, ज्यांचे दैनंदिन काम काँग्रेस आणि त्यांच्या नेतृत्वाविरुद्ध द्वेषाने खोटे पसरवणे आहे.”
Leave a Reply