मुंबई-पुणे द्रुतगती मार्गावरून प्रवास करणाऱ्या वाहनचालकांसाठी पुढील तीन दिवस वाहतूक विस्कळीत होणार आहे. महाराष्ट्र राज्य रस्ते विकास महामंडळामार्फत (एमएसआरडीसी) डोंगरगाव-कुसगाव परिसरातील ५८/५०० कि.मी. अंतरावर पुलाचे गर्डर बसविण्याचे काम हाती घेण्यात येणार आहे. हे काम मुंबईकडे जाणाऱ्या मार्गावर होणार असल्याने वाहनांच्या वाहतुकीवर परिणाम होणार आहे.
हे नियोजित काम २२ ते २४ जानेवारी २०२५ या कालावधीत दुपारी १२ ते ३ या वेळेत होईल. या वेळेत वाहतुकीचा तात्पुरता मार्ग बदलण्यात येईल. मुंबईहून पुण्याकडे जाणाऱ्या वाहनांना वाव्हाणजवळील ५४/७०० कि.मी. अंतरावरून देहूरोडमार्गे वळवण्यात येईल. मात्र, पुण्याहून मुंबईकडे जाणारी वाहतूक पूर्ववत सुरू राहील.
दररोज दुपारी ३ वाजल्यानंतर वळवलेल्या वाहनांना मूळ मार्गावरून प्रवास करण्याची परवानगी दिली जाईल. प्रवाशांनी या कामामुळे होणाऱ्या विलंबाचा विचार करून प्रवासाचे नियोजन करावे, असे आवाहन प्रशासनाने केले आहे.
वाहनचालकांना प्रवासादरम्यान काही अडचणी आल्यास, ते मुंबई-पुणे द्रुतगती मार्ग नियंत्रण कक्षाशी (दूरध्वनी क्रमांक: ९८२२४९८२२४) किंवा राष्ट्रीय महामार्ग पोलिसांशी (दूरध्वनी क्रमांक: ९८३३४९८३३४) संपर्क साधू शकतात. या तीन दिवसांत गर्दी टाळण्यासाठी पर्यायी मार्गाचा वापर करण्याचा सल्लाही अधिकाऱ्यांनी दिला आहे.
प्रवाशांनी सतर्क राहून प्रवासाचे वेळापत्रक समायोजित करावे आणि दिलेल्या वेळेत ट्रॅफिक कोंडी होण्याची शक्यता लक्षात घेऊन प्रवासाचे नियोजन करावे, असे प्रशासनाने सांगितले आहे.
Leave a Reply