गडचिरोली जिल्ह्यात आरोग्य आणि शिक्षण क्षेत्रात क्रांती घडवणारा महत्त्वाकांक्षी प्रकल्प हाती घेण्यात आला आहे. सिरोंचा तालुक्यातील राजेश्वरपल्ली येथे ‘रुबी हॉस्पिटल अँड वेलनेस प्रा. लि.’ तर्फे जागतिक दर्जाचे शैक्षणिक वैद्यकीय संकुल उभारले जाणार आहे. या प्रकल्पाचे भूमिपूजन मुख्यमंत्री देवेंद्र फडणवीस यांच्या हस्ते करण्यात आले.
या भव्य प्रकल्पावर सुमारे ₹१४६८ कोटींचा खर्च अपेक्षित आहे. या संकुलामध्ये ३५० खाटांचे अत्याधुनिक रुग्णालय तसेच वैद्यकीय महाविद्यालयाचा समावेश असेल. या उपक्रमामुळे गडचिरोलीसारख्या दुर्गम व आदिवासी बहुल जिल्ह्यात आरोग्यसेवा आणि वैद्यकीय शिक्षणाच्या क्षेत्रात मोठी झेप घेता येणार आहे.
रुग्णालय उभारल्यामुळे स्थानिक नागरिकांना उच्च प्रतीची वैद्यकीय सेवा मिळणार असून उपचारासाठी नागपूर, चंद्रपूर किंवा हैदराबादकडे धाव घ्यावी लागणार नाही. तसेच वैद्यकीय शिक्षणाची संधी उपलब्ध झाल्याने जिल्ह्यातील विद्यार्थ्यांसाठी नव्या शक्यता निर्माण होणार आहेत.
मुख्यमंत्री फडणवीस यांनी या प्रसंगी सांगितले की, “गडचिरोली जिल्ह्याच्या सर्वांगीण विकासासाठी आरोग्य आणि शिक्षण हे दोन स्तंभ आहेत. या प्रकल्पामुळे जिल्ह्याचा चेहरामोहराच बदलणार आहे.”
या उपक्रमामुळे राज्य सरकारच्या ‘आरोग्य सर्वांसाठी’ आणि ‘शिक्षण सर्वांसाठी’ या धोरणांना गती मिळेल, अशी अपेक्षा व्यक्त केली जात आहे. रुबी हॉस्पिटल अँड वेलनेस प्रा. लि. चा हा प्रकल्प गडचिरोलीसाठी आरोग्यक्रांतीचा नवा अध्याय ठरणार आहे.
Leave a Reply