केंद्र सरकारच्या गृह मंत्रालयाने (MHA) २४ एप्रिल रोजी दिलेल्या आदेशानुसार, महाराष्ट्र, मध्य प्रदेश आणि अन्य राज्यांतील पोलिस विभागांना त्यांच्या कार्यक्षेत्रात असलेल्या पाकिस्तानी नागरिकांना रविवारीपर्यंत देश सोडण्याची खात्री करण्याचे निर्देश देण्यात आले आहेत. पहलगाम येथे झालेल्या दहशतवादी हल्ल्यानंतर जारी करण्यात आलेल्या या आदेशानुसार, वैद्यकीय, दीर्घकालीन आणि राजनैतिक व्हिसा वगळता, सर्व प्रकारचे व्हिसा २७ एप्रिलपासून रद्द करण्यात येणार आहेत. वैद्यकीय व्हिसा असलेल्या नागरिकांना भारत सोडण्यासाठी २९ एप्रिलपर्यंत मुदत देण्यात आली आहे. गृहमंत्री अमित शहा यांनी सर्व राज्यांच्या मुख्यमंत्र्यांना निर्देश दिले आहेत की, अंतिम मुदतीनंतर कोणताही पाकिस्तानी नागरिक भारतात थांबलेला आढळू नये.
महाराष्ट्राचे मुख्यमंत्री देवेंद्र फडणवीस यांनी सांगितले की, राज्यातील सर्व पाकिस्तानी नागरिकांची यादी तयार करण्यात आली असून, त्यांना देशाबाहेर पाठवण्याची कार्यवाही सुरू आहे.राज्यातील सर्व पोलिस ठाण्यांना स्पष्ट सूचना देण्यात आल्या आहेत की, कोणताही पाकिस्तानी नागरिक व्हिसाची मुदत संपल्यानंतर ४८ तासांपेक्षा जास्त थांबता कामा नये. नियमभंग करणाऱ्यांवर कायदेशीर कारवाई केली जाईल,” असे फडणवीस यांनी शनिवारी झालेल्या पत्रकार परिषदेत सांगितले.
राज्य गृह विभागातील एका वरिष्ठ अधिकाऱ्याच्या माहितीनुसार, महाराष्ट्रात अल्पकालीन व्हिसावर असलेल्या एकूण ५५ पाकिस्तानी नागरिकांना देश सोडण्याचे आदेश देण्यात आले आहेत. त्यापैकी १८ नागपूरमध्ये, १९ ठाण्यात, १२ जळगावमध्ये, ३ पुण्यात तर प्रत्येकी एक नवी मुंबई, मुंबई आणि रायगड जिल्ह्यात आहेत. मध्य प्रदेशचे अतिरिक्त पोलिस महासंचालक (कायदा व सुव्यवस्था) ए. साई मनोहर यांनी सांगितले की, राज्यातील व्हिसाची मुदत संपणाऱ्या पाकिस्तानी नागरिकांची ओळख पटवून त्यांच्यावर लक्ष ठेवण्याची प्रक्रिया सुरू आहे.
राज्याच्या गृह विभागातील एका वरिष्ठ अधिकाऱ्याच्या माहितीनुसार, मध्य प्रदेशात सुमारे २३५ पाकिस्तानी नागरिक आहेत. “यापैकी बहुतांश नागरिकांना आधीच भारत सोडण्याचे निर्देश देण्यात आले आहेत आणि बरेच जण परतीच्या मार्गावर आहेत. तरीही, अंतिम खात्रीसाठी माहिती तपासली जात आहे,” असे त्यांनी सांगितले. अद्याप अंतिम आकडेवारी गोळा करण्याचे काम सुरू आहे. उत्तर प्रदेशातील प्रयागराज येथे पोलिस आयुक्त तरुण गाबा यांनी सांगितले की, जिल्ह्यात चार पाकिस्तानी नागरिक होते. यापैकी एकाने कालच भारत सोडले असून उर्वरित तीन नागरिक आज रात्रीपर्यंत देश सोडतील, असा अंदाज आहे. बिहार सरकारनेही स्पष्ट केले आहे की, राज्यात असलेले सर्व पाकिस्तानी पर्यटक गृह मंत्रालयाच्या अंतिम मुदतीपूर्वीच भारतातून गेले आहेत. दिल्लीमध्ये मात्र पाकिस्तानी हिंदू निर्वासितांची ओळख पटवून त्यांना मदत करण्यासाठी विशेष मोहिम राबवली जात आहे.
Leave a Reply